خطواتِ ستّه
لبدیع الزمان
هدیه در
اَعُوذُ بِاللهِ مِنَ الشَّيْطَانِ الرَّجِيمِ
وَلاَ تَتَّبِعُوا خُطُوَاتِ الشَّيْطَانِ[*]
[*][شيطانكۡ ايزينى تعقيب ايتمهيكۡ. بقره سورهسى، ٢:١٦٨، ٢٠٨؛ انعام سوره سی، ٦:١٤٢ ]
هر بر زمانكۡ إنسى بر شيطانى واردر. شيمدى بشرده إنسان صورتنده شيطانكۡ وكيلى اولان روحِ غدّار، فتنهكارانه سياستيله جهانكۡ هر طرفنه قونداق صوقان الخنّاس، آلتى خطواتيله عالمِ إسلامى إفساد ايچون إنسانلرده و إنسان جماعتلرندهكى خبيث منبعلرى و طبيعتلرندهكى مضر معدنلرى، فعلى پروپاغنده ايله ايشلتديرييور، ضعيف طمارلرى بولويور.
كمن حرصِ إنتقامنى، كمن حرصِ جاهنى، كمن طمعنی، كمن حمقكۡى، كيمكۡ دينسزلگنى، حتّى أكۡ غريبى، كمن ده تعصّبنى ايشلهتوب سياستنه واسطه ايدييور.
برنجى خطوهسى دير ويا ديديرر:
سز كنديكۡز ده ديرسكۡز كه: مصيبته مستحق اولديكۡز. قدر ظالم دگل، عدالت ايدر. اويله ايسه، سزه قارشى معاملهمه راضى اولكۡز.
شو وسوسهيه قارشى ديمهلىيز: قدرِ الٓهی عصيانمز ايچون مصيبت ويرر. اوكۡا رضاداده اولمق، او گناهدن توبه ديمكدر. سن أى ملعون! گناهمز ايچون دگل، إسلاميتمز ايچون ظلم ايتدكۡ و ايدييورسكۡ. اوكۡا رضا ويا إختيارله إنقياد ايتمك -نَعُوذُ بِاللّٰه- إسلاميتدن ندامت و يوز چويرمك ديمكدر.
أوت عين شيئى هم مصيبتدر اللّٰه ويرر، عدالت ايدر. چونكه گناهمزه، شرّيمزه زجرًا اوندن واز گچيرمك ايچون ويرر. او شيئى عين زمانده بشر ويرر، ظلم ايدر. چونكه، باشقه سببه بناءً جزا ويرر. ناصل كه دشمنِ إسلام، عين شيئى بزه إجرا ايدييور. چونكه مسلمانز.
ايكنجى خطوهسى دير و ديديرتير:
باشقه كافرلره دوست اولديغكۡز گبى بكۡا ده دوست و طرفدار اولكۡز. نهدن چكينيورسكۡز؟
شو وسوسهيه قارشى ديرز:
معاونت ألى قبول ايتمك آيريدر. عداوت ألى اوپمك ده آيريدر. بر كافركۡ هر بر صفتى كافر اولمق و كفرندن نشئت ايتمك لازم اولماديغندن، إسلامكۡ أسكى و متجاوز بر دشمننى دفع ايچون، بر كافر معاونت ألى اوزاتسه، قبول ايتمك إسلاميته خدمتدر.
سنكۡ ايسه، أى كافرِ ملعون، سنكۡ كفرندن نشئت ايدن تسكين قبول ايتمز خصومت ألنى اوپمك دگل، تماس ايتمك ده إسلاميته عداوت ايتمك ديمكدر.
اوچنجى خطوهسى دير ويا ديديرتير:
شيمدىيه قدر سزى إداره ايدنلر فنالق ايتديلر، قاريشديرديلر. اويله ايسه بكۡا راضى اولكۡز.
بو وسوسهيه قارشى ديرز:
أى الخنّاس! اونلركۡ فنالقلرينكۡ أصل سببى ده سنسكۡ. عالمى اونلره طارلاشديردكۡ، طمارِ حياتى كسدكۡ، أولادِ نامشروعنى اونلره قاريشديردكۡ. دينسزلگه سَوق ايدهرك دينى رشوت ايستردكۡ. اونلره بدل سنى قبول ايتمك، يالكۡز متنجّس صو ايله نجس اولمش بر لباسى، خنزيركۡ بوليله ييقامق ديمكدر. سن يالكۡز حيوانجهسنه موقّت بر حياتِ سقیلانەیی بزه بيراقييورسكۡ؛ إنسانجه، إسلامجه حياتى ئولديرييورسكۡ. بز ايسه هم إنسانجهسنه، هم مسلمانجهسنه ياشامق ايستهيورز. سنكۡ رغمنه ياشايهجغز!
دردنجى خطوهسى دير ويا ديديرتير
سزى إداره ايدن و بكۡا مخاصم وضعيتنى آلانلر كه آناطوليدهكى سرگردهلريدر مقصدلرى باشقهدر. نيّتلرى دين و إسلاميت دگلدر.
شو وسوسهيه قارشى ديرز:
وسيلهلرده نيّتكۡ تأثيرى آزدر. مقصدكۡ حقيقتنى تغيير ايتمز. چونكه چونكە، وسيلهنكۡ وجودينه ترتب ايدر؛ ايچندهكى نيّته باقماز.
مثلا، بن بر دفينه ويا صو بولمق ايچون بر قويو قازييورم. برى گلدى، كندينى صاقلامق ويا اوراده مزخرفاتنی دفن ايتمك ايچون، بكۡا يارديم ايدهرك قازدى. صويكۡ چيقماسنه و دفينه بولونماسنه نيّتى تأثير ايتمز. صو، فعلنه، قازماسنه باقار، نيّتنه باقماز. بونكۡ گبى، اونلر بزى كعبیە گوتورويورلر.
قرآنی يوكسك طوتمق ايستهيورلر. [بتون، بوتون] فلاكتمزكۡ منبعى اولان آوروپا محبّتنه بدل، خصومتنى أساس طوتويورلر. نيّتلرى نه اولورسه اولسون، بو مقصدلرڭ حقيقتنى تغيير ايدهمز؟..
بشنجى خطوهسى دير: إرادهِٔ خلافت، سياستمكۡ لهنده چيقدى.
شو وسوسهيه قارشى ديرز:
بر شخصكۡ آرزوىِ ذاتيسى و أمرِ خصوصيسى باشقهدر، اُمّت نامنه أمين اولارق درعهده ايتديگى أمانتِ خلافتدن حاصل اولان شخصيتِ معنوی یەنڭ إرادهسى بامباشقهدر.
بو إراده بر عقلدن چيقوب، بر قوّته إستناد ايدهرك، عالمِ إسلامكۡ مصلحتنى تعقيب ايدر. عقلى ايسه، شورای اُمّتدر؛ سنكۡ وسوسهكۡ دگل. قوّتى مسلح اوردوسى، حرّ ملّتيدر؛ سنكۡ سونگولركۡ دگلدر. مصلحت ده محيطدن مركزه نظر ايدوب إسلام ايچون فائدهِٔ عظمايه ترجيح ايتمكدر. يوقسه، عكسنه اولارق مركزدن محيطه باقمقله عالمِ إسلامى بو دولته، بو دولتى ده آناطولىيه، آناطولىیدە إستانبوله، إستانبولى ده خانەدان سلطنته تعارض وقتنده فدا ايتمك گبى خود اندیشانە فكر و إراده، دگل وحیدالدین گبى متديّن بر ذات، حتّى أكۡ فاجر بر آدم ده، يالكۡز إسمِ خلافتی طاشيديغى ايچون إختياريله ايتمز. ديمك، مُكْرَهْدر. او حالده اوكۡا إطاعت، عدمِ إطاعتدر.
آلتنجى خطوهسى دير كه: بكۡا قارشى مقاومتكۡز بيهودهدر. متّفقكۡز برابركن ياپامديغكۡز شيئى شيمدى ناصل ياپاجقسكۡز؟
شو وسوسهيه قارشى ديرز:
أكۡ زياده حيله و فتنه قوّتيله آياقده طوران عظمتلى قوّتكۡ بزى يأسه دوشورمييور.
أوّلا: حيله و فتنه، پرده آلتنده قالدقجه تأثير ايدر. ظاهرە چيقمقله إفلاس ايدر، قوّتى سونر. پرده اويله ييرتيلمش كه، سنكۡ يالان، حيله، فتنه هذيانه، مسخرهلغه انقلاب ايدوب عقيم قالييور. بو دفعهكى آناطولىيه قارشى.... گبى…
ثانيًا: او قوف قوّتكۡ يوزده طقسانى سكۡا قارشى ائتلاف قبول ايتمز. مخاصیم بر جريان، عطالته محكوم ايدييور. فضله قالان قوّتكۡله درد و درمانده مشترك اولان عالمِ إسلامى صوصديرهجق، تپرتمیەجك درجهده أسكى گبى بر استبداد آلتنده طوتمغه إحتمال ويرسهكۡ، شيطان ايكن أشگكۡ أشگى اولورسكۡ! *
- - -
[*] هَىْ اكپك الكپكاء! كوپكدن تككپ ايتمش كوپك!..
- - -
ثالثًا: مادام كه ئولديرييورسكۡ. ئولمك ايكى صورتلەدر:
برنجى صورت: سنكۡ آياغنه دوشمك، تسليم اولمق صورتنده روحمزى، وجدانمزى أللريمزله ئولديرمك، جسدى ده گويا روحمزه قصاصًا سكۡا تلف ايتديرمكدر.
ايكنجى صورت: سنكۡ يوزينه توكورمك، گوزينه طوقات وورمقله روح و قلبمز صاغ قالير، جسد ده شهید اولور. عقيده فضيلتمز تحقير ايديلمز؛ إسلاميتكۡ عزّتيله إستهزا ايديلمز.
الحاصل: إسلاميت محبّتى، سنكۡ خصومتنى إستلزام ايدر. جبرائيل، شيطان ايله باريشهماز.
سياستمزده أكۡ آجينهجق، أكۡ أبله بر عقل وارسه، او ده اويلهلركۡ عقليدر كه، (...) ملّتنكۡ إحتراص و منفعتنى، إسلاميتكۡ منفعت و عزّتيله قابلِ توفيق گورويور. بوراده أكۡ سفيل و أكۡ أحمق قلب، اويلهلركۡ قلبيدر كه، حياتى اونكۡ حمايتى آلتنده قبول ايدر. حياتمزى اونكۡ حمايتى آلتنده قابل گورويور.[*] چونكه، اويله بر شرطه حياتمزى تعلیق ايدييور كه، محال أندر محالدر.
- - -
[*] خدا مرو شاش دكە، كاش نكە.. كاش دكە، فحش نكە.. فحش دكە، پرش نكە.. پرش دكە، پریشان نكە.. پریشان دكە، مشوش سرگردان نكە!..
* * *
اللّٰه كيمسهيى شاشيرتماسين، شاشیرتیرسه سوروندیرمهسين، سوروندیررسه چكدیرمەسين، چكدیریرسە رذيل ايتمهسين، رذيل ايدرسه پريشان ايتمهسين، پريشان ايدرسه سرسم، آواره ايتمهسين.
- - -
دير: "ياشايكۡز. فقط بر تك آدم بكۡا خيانت ايتسه ياقارم، ييقارم!"
شايد بر آدم حقّه صداقت نامنه اونكۡ كافرانه ظلمنه قارشى خيانت ايتسه، آياصوفيايه إلتجا ايتسه، ميليارلره دگر او مقدّس بنايى خراب ايدر. وياخود، بر كويده اوكۡا بر خائن بولونسه، چولوق چوجغيله محو ايتمك، ويا بر جماعتده اوكۡا مضر برى وارسه جماعتى افنا ايتمك، هر وقت كندنده صلاحیت گورويور. لعنت او مدنيته كه، اوكۡا او صلاحیتی ويرمش! عجبا، بتون ملّت بر قلبده-هم منافق، خنچرِ ظلمندن متلذّذ اولاجق أحمق بر قلبده-إتّفاقندن داها محال نه وار؟
شيطان گبى خسيس حسلرى، فنا أخلاقلرى تشجيع و حمايه ايدر، ايى حسلرى سوندورر. هم إنسانى، إسلامى حياتى منع ايتمكله برابر، موقّت حيوانى بر حياتى، ايكى گنجِ مجهّز، پنچهلى؛ أكثريتى قزانمق ايچون، إمحايى أساس پروغرام ياپمش، ايكى كلبى ايكى جگريمزه مسلّط ايدهرك بزى سلاحدن تجريد ايدييور. ايشته اونكۡ حمايتى، ايشته حياتمز!
او خصم، گوسترديگى كين و خصومت حربدن نشئت ايتمه دگلدر. حربدن اولسيدى، طبيعى مغلوبیتمزلە سائرلركۡ خصومتى گبى سكونت بولوردى. هم خصمكۡ، اوزاقده چركين يوزندهكى رياكارانه چيزگيلرى گوزل ظن ايديليردى. ياقينده گورنلر، ان شاء اللّٰه داها آلدانماز.
كَمَا اَنَّ الضَّرُورَاتِ تُبِيحُ الْمَحْظُورَاتِ * كَذٰلِكَ تُسَهِّلُ الْمُشْكِلاَتِ
[ضرورتلر، ياساقلر مباح قيلديغى گبى زورلقلری ده قولايلاشديرر]
قورقاقلقده ضربِ مَثل حكمنده اولان طاووق، چوجقلرى ياننده ايكن شفقتِ جنسيه سببيله ?جاموس? صالديرر. ايشته دهشتلى بر جسارت...
هم ضربِ مَثل اولمش: "كچى قورددن خوفى، إضطرار وقتنده مقاومته انقلاب ايدر. بوینوزیلە قوردكۡ قارننى دلديگى واقعدر. ايشته خارقە بر شجاعت…
فطرى ميلان مقاومتسوزدر.
بر آووج صو، قالين بر دمير گلّه ايچنده آتيلسه، قيشده صوغوغه معروض بيراقيلسه، مَيلِ إنبساط دميرى پارچهلر.
أوت، شفقتلى طاووق جسارتى، حميتلى كچى اضطراری شجاعتى گبى، فطرى بر هيجان دمير گوللهده صو گبى، ظلمكۡ برودتلی خصومتِ كافرانەسنە معروض قالدقجه هر شيئى پارچهلر. روس موژيقلرى بوكۡا شاهددر.
بونكۡله برابر، ايمانكۡ ماهيتندهكى خارق العادە، عزّتِ إسلاميتكۡ طبيعتندهكى عالمپسند شجاعت، اخوّتِ إسلاميهنكۡ إنتباهيله هر وقت معجزهلرى گوسترهبيلير.
تمت